قاتل الله ( المسقفين)

على بخيت الشريف

لا مجال لنفي صفة التجهم والتكشير عن الشعب السوداني .
فالرجل ان ضحك يعد نوعا من انكسار الهيبه وان ضحكت المراه فهذه قلة ادب . التراث الاسلامي والعربي الذي دائما ما نحاول ان ننسب له مكونات الشخصيه السودانيه ملئ بالضحك والقرفراب
( وضحك هارون الرشيد حتي فحس الارض بقدميه )
وضحك عبد الملك بن مروان حتي بدت له سن سوداء كان يخفيها )
(وضحك بن سيرين حتي سال لعابه )
(وضحكنا حتي بال احدنا في سراويله )
عندما يتحلق الكهربجيه والميكانيكيه وعمال الافران وبائع الطعميه وبائع الفحم حول جهاز راديو في القرن ال 21 ليستمعوا الي الدراما السودانيه في شقها الضاحك ثم ينفجر الجميع ضحكا في رابعة نهار رمضان رغم حرارة الجو وسوء الحال فهذا بلا شك نجاح لا يدانيه نجاح .
كنا مثلهم نستمتع بالدراما السودانيه قبل ان تتمكن منا الثقافه ومعرفة الرؤي الاخراجيه وزوايا الكاميرا والسيناريو والمونتاج والدوبلاج والمكساج . اذكر اننا في منتصف الثمانيتيات استطعنا بعد محاولات دامت ثلاث ليالي من حضور عرض مسرحية النص الحلو للمرحوم الفاضل سعيد في سينما كادوقلي (نوبه وعرب وزنج وحلب ) ضحكنا ليلتها حتي فحسنا الارض باقدامنا (عاجباني فحسنا دي بالمناسبه ) ثم لما استبدت بي الثقافه اذكر مرة كنت جالسا عند ست شاي في تقاطع المؤسسه مع شارع المعونه في بحري فجاء المرحوم الفاضل سعيد مع اتنين من اصحابه وطلبوا شاي فما كان مني الا ان جقمت ما بقي من الشاي وغادرت المكان متحدثا الي نفسي ( راجل نمطي جدا ) نحن قوم نقاوم الضحك بقدر استطاعتنا ونسعي جهدنا لمقاومة كل ما من شأنه الترويح عن النفس . حتي في (السكر ) يقول ليك انا جدي الله يرحموا كان حوض رمل والله كان يدخل الاندايه وينزل الرايه ما يطلع الا المغرب ويجيك ماشي دغري زي الصراط المستقيم (لا ماشاء الله شريب , شريب جدا. ثم منو القال انو السكر بكمية العرقي ؟ السكر كما هو معلوم توفيق او كما قالت النكته ..استغفر الله العظيم ) جمال حسن سعيد . جمال عبد الرحمن . سميه عبد اللطيف , عبد الحكيم الطاهر . محمد المهدي الفادني هؤلاء رائعون جدا واصلوا اضحاك اتعس شعب علي ظهر البسيطه , دعكم من المثقفين (طز فيهم ). مسلسلات رمضان الاذاعيه .
اعلموا ايها العطماء ممن يقدمون دراما اذاعيه متميزه انكم تتفوقون علي نظرائكم المصريين والسوريين والاتراك رغم انعدام الامكانيات ان انسي لا انسي ( الهادي صديق في دور شاب متعلم ومثقف وبحب واحده غير متعلمه . بقول ليها بصوته الجميل داك ( يا اميره أنا ..أنا .أنا .قالت ليه (ات) مالك يا ود ابوي ؟ قال ليها انا حقيقة خايف لو (قصة حبنا) دي انتهت خايف اموت ) حبوبتي كلتومه الله يرحمها كانت قاعده في عنقريبها وبتتوضأ للعصر قالت (شوف الخايب دا تموت ليك عشان مره يا خفلوق ؟)
(خفلوق دي حصريه جدا لحبوبتي معناها زول ما كويس ..لا مؤاخذه )
الممثلين الكبار .يس عبد القادر . حمدنا الله عبد القادر.محمد خيري. الريح عبد القادر.محمد بشير دفع الله, عوض صديق . الهادي صديق . تحيه زروق . فايزه عمسيب . سعاد محمد الحسن . ناديه بابكر . زكيه محمد عبد الله . ساميه عبد الله . رابحه محمد محمود .هاله اغا
تحيه خاصه جدا للمبدع جدا محمد شريف علي .شفاه الله
جماعة الاصدقاء
كتاب الدراما والمخرجين والموسيقيين
عبد الناصر الطايف.انس احمد عبد المحمود. قريب محمد رابع.عادل ابراهيم محمد خير . سعد الدين ابراهيم , عبد الرحمن الشبلي , السر السيد . محمود ميسره السراج . ابوعركي , محمود عبد العزيز .يحي فضل الله
قطار الهم .. الدهبايه .وادي ام سدر . وادي المرفعب .اب جاكومه
انا شخصيا ممتن لهؤلاء الكبار جدا المبدعين حقا من يقاتلون دون سلاح وفي عدة جبهات ( شح الامكانيات ..الحكومه ..المثقفين خالص وما أكثرهم .. المستلبين ,,,المتجهمين والمتجهمات ممن يشتري احدهم تذكرة المسرح ثم يقف ساعة امام المرايه حتي يجهز صرة وجه تليق بالعرض؟
بالله ما شفتو المصريين ديل علي قول شوقي بدري تلقاهم خاتين ليهم بنقو نوع تااااااااافه وكعععععب يقوم الواحد يقول للتاني: دا انا النهار دا سعيد سعاده يقوم التاني يقول ليه ..سعيد صالح؟ وتسمع أأأأأأأأأها أو أو أو حلوه