كوكب العشاق عزة

خليل فرح :

عزة في هواك… عزة نحن الجبال
وللبخوض صفاك… عزة نحن النبال
عزه ما بنوم الليل محــــال
وبحسب النجوم فوق الرحال
خلقة الزاد كمل وأنا حالي حال
متين أعود أشوف ظبياتنا الكحال
عزه ما سليت وطن الجمــال
ولا ابتغيت بديل غير الكمــال

وقلبي لي سواك ما شفتو مال
خذيني باليمين وأنا راقد شمال
عزه ما نسيت جنــة بلال
وملعب الشباب تحت الظلال
ونحن كالزهور فوق التلال
نتشابي للنجوم وأنا ضافر الهلال
عزة جسمي صار زي الخلال
وحظي في الركاب صابو الكلال
وقلبي لسه ما عرف الملال
أظنه ود قبيل وكريم الخلال
عزه ما اشتهيت نوم الحجال
ولا السوار بكى في يمينا جال
وعزه في الفريق لي ضيق مجال
قبيلة بت قبيل ملأ الكون رجال

عزة شفتي كيف نهض العيال
جددوا القديم تركوا الخيال
روحك أم سماح سري كالسيال
شجوا الفؤاد حيوا محسور الليال
عزه في الفؤاد سحرك حلال
ونار هواك شفى وتيهك دلال
ودمعي في هواك حلو كالزلال
تزيدي كل يوم عظمه ازداد جلال

عزه في حدا الخرطوم قبال
وعزه من جنان شمبات حبال
وعزه لي ربوع أم در جبال
وعزه في الفؤاد دوا يشفي الوبال