( أشواق روتردام ) ……!!!

الطيب عبد الماجد :

يوميات علوب

جات من هولند يازول مركبه ليك مكنة
( إياكس أمستردام )
الكلام دا ذاتو كيف …!! وأي حاجه يقارنوها بي ( هولندا ) صفق الشجر دا ما خلتو ….قالت هناك أخدر شديد

يكون مدنو أورنيش …!!؟؟؟

دي أختنا ( أشواق ) بت عمك جبارة
كانت شغالة ليها في واحدة من المنظمات دي ودوهم ( هولندا ) دورة بتاعة قدرات وتطوير طوالي عملت زغبير
ودي أول زياره ليها لربوع الوطن بعد ( الخندقة )
….
جاتنا زي الكتاحة …..فصمة السنين
وداخله في الشخصية ……..!!

قالت ( الماعز الجبلي ) دا جا من وين لطيف شديد ..

الماعز الجبلي دا ( تيس ) ناس ( جابر ) ….
لافي في الحلة دي من زمن الانجليز لما بقي يسلم على الناس ….!!
وبعرف ( أشواق ) دي ذاتا حق المعرفه ….
نكرتو حطب

( مشاعر ) قالت لي مملومين كلنا عند ناس ( وفاء ) جات من هناك خلاص يعني البت جايه من أوروبا تشيل وتتهبب ….
البنات شامنها شديد ويعانين لي بعض

وكل دقيقة شابكاهم ليك لا لا إنتو ما عايشين ….!!
ودي ما عيشة ….
والكهربا في هولندا ما قطعت من الحرب العالميه التانيه …!!
ونحنا هناك الخبز ستة أنواع
وعشرة أنواع من الجبن البقري الصافي ….!!

( مودة ) بي تحت تحت قالت لي ( أمنيات ) قولي ليها
( بقري اكتر من دمك دا )
والبنات يبلعن في كلاما دا بليع …..!!

وكت قالت البلد دي خلاص إنتهت وإنتو مدفونين بالحياة

إنبرت ليها إعتدال….( إعتدال الزين ) دي مولعة نار علما في نص راسا ..

قالت ليها شوفي يا (أشواق )متابعنك لحدي ( المعيز ) والجبنة والقصص بتاعتك دي ..
بس لو سمحتي البلد دي ما انتهت ولا بتنتهي …
البلد نحن قاعدين فيها وراجنها ….وحندق الأرض دي لحدي ما تطلع الجواها فهمتي ….
ماعندنا مشكله ان شاءالله الهولنديين يعملو ليك تمثال
بس رجاءًا ما تسيئ للبلد دي ..واضح

البنات صفقن …..

( أشواق ) كمان دايرا تتفلسف قالت ليها …
عليك الله ما تشكري لي الراكوبة في الخريف …!!

( إعتدال ) قالت ليها الراكوبة دي نحن شايفنها أحسن من قصر الملكة بتاعتك في هولندا …..
ودايرين نبنيها طوبة طوبة …..
دايره تبني معانا أهلاً وسهلًا دايره تنفضينا كمان دا موضوع بخصك …. ما تحبطي لينا البنات

بعدين يا ( أشواق ) لغتك دي ذاتا مستفزه
إنتي نسيتي روحك ولا شنو …!!؟

إنتي قبل سنتين توبك دا طاير من الركشة زي علم الرئيس ….!! الحاصل شنو ….!’
تجي تقولي أنا بشتري حاجاتي من ( امستردام ) حاجاتكم هنا رخيصة وكلها تقليد …..!!
تستفزي البنات
إنت ( سعد قشرة ) دا ما كنتي حافظا أكتر من نشيد العلم

نحن صابرين يا ( أشواق) في البلد دي وبنحبها
وما تشوفينا كدا نحن لافين العالم دا كلو بالإنترنت دا شايفنو زقاق زقاق …حتى حلتك الفي هولندا دي شايفنها
كلها طاحونة هوائية وبقرتين ماتعملي لينا إزعاج

وانتهي الشوط الاول بين السودان وهولندا
0/6 لمنتخبنا الوطني ..

وقالت ليها إنتي مالك ماشفتي السودانيين الفي هولندا دي أيام الثورة ديك واقفين كيف ..وطالعين معانا رجل بالرجل إنتي جايه من وين ..

طبعا نوع الكلام دا ما بعجبا …..وقفت على حيلا قالت عندها مواعيد وهي ملاحظة الناس في البلد دي ما بتحترم المواعيد …!!
( ملاحظة من متين!!؟؟ )

المهم وهي طالعة كدا الكهربا قطعت

( غايتو كمان ناس الكهربا ذاتم اصلو ما بنسترو معانا طوااااالي محرجننا وفاضحننا )

أخدت ليها ضحكة لزجة كدا ….قالت الحمد الله البيان بالعمل ما جبتا حاجه من عندي
قلنا ليها وشنو يعني ما تقطع وماكانت بتقطع وإنتي معانا ….الجديد شنو …!!؟؟
تتذكري يوم قطعت وجيتي الحفله بي شال أبوك قايلاهو طرحة ….احسن تطلعي من الدور دا …!!

السودان دا يا ( أشواق ) حالة خاصة وكلو مشاكل وأزمات
لكن بنحبو وبنموت فيهو بي كهربتو القاطعة ومشاكلو دي كلها …قدرنا كدا … فيهو ذكرياتنا وحاجاتنا وملامحنا وتفاصيلنا …وياهو بلدنا وروحنا وحبنا ….!!!
والأهم من دا كلو إنو عندنا ثقة كبيرة إنو حيطلع ….!!

طوالي مرقت …مشت تكوس ليها ليها حتة تانيه تتجدع فيها
بتصدقو وهي مارقة قالت للبنات
( توووووت سيييينز )

( توت سينز ) دي يعني مع السلامة بالهولندي …..
عليك الله شوف البت دي وثقالتا …!!

غشت دكان ( يس ) قالت ليهو دايرا معجون أسنان
أداها المعجون ….
تقلب فيهو نص ساعة ….قالت ليهو وين تاريخ الإنتهاء عمك داير يقع من الضحك …

( أربعين سنه دكاكين …مافي زول سألو سؤال زي دا )

عاين ليها كداااا قال ليها إنتو دايرين تتسوكو بيهو
ولا دايرين تاكلو ….!!

روقي يابتي روقي …

المهم ( أشواق ) قالبا الحلة قلب …….!!

قالو بتفتش ليها في كديسة تشتريها تكمل بيها المنظر عاملة إعلان في صفحتا في الفيس كاتبا مطلوب قطة ( شيرازية ) والدفع بعد المعاينه

( سبحان الله ناس اشواق ديل كان عندهم كديسة
عدمت الحلة دي الحمامة ) ..

أها ناس( الكجم ) سمعو الخبر قرروا يدخلو المزاد دا …..

قبضو ليهم كم كديسة كدا لقوهم كبار ..
في النهاية لقو ليهم واحدهة والدا جديد …سرقو منها واحد جابو لي ( أشواق ) …
وهي طبعا داخله في الدور شالتو وأدتم ( خمسين ) 50€ يورو عارفاهم بعملو دعايه في الحلة

طوالي مشو لي ( عكام ) ….!!
( عكام دا أكبر ( جوكي ) عمله في حلتنا .. الناس كلها عارفا )
شالا منهم طوالي فكاها ليهم بسعر الواطا
( عكام ) دا دا الشفع بسمسر فيهم ….خلي البلد
وناس الكجم يعجبوك لفحوها وجرو ….!!

والأميرة ( أشواق ) خاشه في الدور لبست الكديسة طوق وتشربها في اللبن …وأم الكديسة تفتش لي جناها

وبي حاسة الأمومة وصلت للهدف ….!!

يمين الساعة الهجمت على ( أشواق ) دي
نحن قلنا ضربو سد النهضة ….

( الليله ووب ) دي فكتا ليك بي طول حسها معاها ( بِس)

( بت اللذينا ) …ما كان تقوليها بالهولندي ….!!

( رجعت الدايمة بت جبارة )

( الكديسة ) شالت جناها ومشت …وناس ( الكجم ) باعو ليها بضاعة مضروبه …..!!
عفيت منك يا كجمنتو
أوروبا دي ضاربانا زمنا دا كلو يشيلو الصمغ كعكعول
يجيبو لينا ( بيبسي ) و( بندول ) ونحن نمعط ..

وبي سعر ( عكام ) ….

وأشواق فشلت في ضرب البلد رغم حالا المايل

ولسا زولتك مصره على الدور صادف اليوم داك عرس ناس ( باخت ) جيرانا في الحلة كان في الصالة

يازول جات لابسه ليها لبسه كدا زي رواد الفضاء
قايله روحا ( الأميرة آن ) والطاقيه بتاعة عجايز السبق ديك

ناس مشاعر ميتات بالضحك …

البت دي إنفصمت رسمي ….!!
والجوينتات التقول محضر عملية
وناس الحله بس يتفرجو ….!!
الشفع قالو بتشبه (ماوكلي ) فتى الأدغال

عندنا واحد في الحلة مسكين كدا اسمو ( وداعة ) مشهور بي ( سليقة )
ود الحاجه قال لي
( إنتا يا صاحبي بدل السنبك دا ما تخش في ( أبو الشا ) دي تعرسا تدخل بيها الكنتة ) …

الفكره لمعت في راسو ….

قالو وكت كلموها قالت ليهم أنا وكتين اعرس و أفطر
أفطر بي ( سليقة ) والله ياهو الفضل …!!

ود الحاجه قال ليها والله بالحالة الشايفا دي
تابيها ( سليقة ) تكوسيها ( قرقوش ) …….!!
والجماعة دايرين يموتو من الضحك ..!!

( أشواق ) وكت قنعت ستفت ليك شنطا وشتمتنا كلنا ونبذت السودان وتوجهت للمطار ….!!
وقالت إنتو متخلفين وبلد متخلفة
وتاني أصلاً ما جاياكم ولا دايرا أشوف وشكم دا

وخليكم في حالكم دا ….والسودان ان شاءالله يضوي ليكم
وعمركم ماحتتقدمو … وبلدكم وسخانة وحالتكم بالبلا
وواصلت العرض لحدي المطار قالت دا مطار زباله ومنتهي واي محطة بص عندنا في هولندا أحسن وانضف منو ….. وتعامل كعب …وسير العفش يطمم البطن ….!!
ماخلت لينا صفحة غسيل ومكوة وعملت كم شكله في
الكاونتر قالت مافي نظام ً وركبت الطياره
ربطت الحزام قالت تاخد ليها نومة شوية
من تعب البلد دي …..!!!

فجأة حست ليها بي زي شوك كدا في ضهرا
عاينت شافت أمها طشاش كدا واقفة وبتلكز فيها بالمقشاشة ..

قالت ليها دا آخر ما اتوصلتي ليهو …
تساهري الليل كلو في الإنترنت والكلام الفاضي ودايرا تنبطحي تنومي لي نص النهار مش كدا …!!

قومي تقوم قيامتك …ياقليلة الأدب ..يا عديمة التربية

العدة كلها مردومة ….والبيوت وسخانة وإنتي راقدة نايمة …قووومي

وتاني أدوها طعنة بالمقشاشة ….!!

قامت ترفس وتلعن وتكورك ….قالت دي ما عيشه دي …
أمها قالت ليها دا ياهو العندنا لو عجبك يا قليلة الادب

وقامت أشواق ….تجرجر أذيال الخيبة

اخدت ليها ضحكة كدا اتذكرت حلمتا القبل شويه بي هولندا 🇳🇱 دي …..

قالت لي أمها الله بس يخارجنا منك ومن البلد دي
إن شاءالله روتردام

أمها قالت ليها ديل شياطين الإنترنت المتابعة دا
وعاجلتها بضربه خطافيه أخرى…
جرت على اثرها ( أشواق )
……دخلت جوه ربطت راسا ودخلت على العدة دي لقتا واقفة بوخ ( جبل الجليد ) 🥣

المهم غايتو إتوكلت وبدت المعركة
تجلي في الحلل وتغني ….

حبيبي تعال تعال نتلم …..🎼ما دام اختلط بالدم
مادام الريد اختلط بالدم أنا ذنبي ايه سيبوني الهم
ياحبييي ….!! 🎼

آي كدا يا ( أشواق ) …..الرفيق قبل الطريق

سوقي العده واستغفري ياهو حال الدنيا ….

أمها جات داخله قالت ليها آميييين ان شاءلله
تتلمي واشوف جناك ..

شوف الام دي حلوة كيف…حلا شديدة

انتبهت كدا قالت والله يا اخوانا صوتي مافيهو عوجه
مالو هسا ما أغني واشتهر
قالت لي أمها
رايك شنو يا امي في الإسم الفني دا …

( أشواق ) روتردام
أخدت ليها لبعة لما حوصت
خلت أمها مرقت من المطبخ شالت ليك ( الكمشة ) دي
مكرفون 🎤 ودخلت في الدور ….اتخيلت نفسها في نادي الضباط
وشبكت ليك الحلل والكبابي 🥛🥛🍵🍵

يلا يا أخوانا الصفقة فوق
الصفقة تعبانه شديد …
أنا ( أشواق روتردام ) لأي أوهام ….
ايوووووا

يازول اندمجت شديد لفحت ليها صحن جابتو الواطا
دشدشتو
المره دي الضربه كانت جويه
( قنبلة صوتية )
أمها من بعيد قالت ليها …دا ياتو فيهن …!!؟؟؟

( أول مره اعرف انو الصحانة دي عندها أسماء )

وخاطبتها بصوت مليئ بالحسرة و الألم …

خلاص كسرتيهو ….!!؟؟؟.

بكسرك زيو يا أشواق يابتي
شوف يابتي دي ذاتا كيف …!!
حنينه ياخ وسط الدقداق دا

صحي قال ثم من …!!

وأشواق دخلت في فاصل …!!

واستدركت أمها قوة الضربة فا عقبتها
ب ( قايلة مستغفرة )
لتكسر حدتها فقلبها الكبير لا يحتمل …..

( تفلق وتداوي حرفياً )

البت دي لازم يشوفو ليها معهد لغة انجليزيه ولا كورس كمبيوتر سريع …بالطريقة دي حتكسر أي حاجه

اخدت ليها صنة كدا وحدثت نفسها قائلة ….!

مالو ( وداعة ) والله لو شدا حيلو البلزو ما يرمي
قال سليقة قال والله دا المحشي والمكرونة والعرسة المضمونة
ودعتك لي أمين الوداعة يا وداعة

هياااااااا الودعتك …

ويا ملاذ أفكارنا الهيمانة نشتاق ليك وأنت معانا

والدنيا منى …وأشواق….!!!

صحي يا أبو الشا

كتمت