جلابة الجن والجنادب والجراد والجنجويد

سيد الطيب:

المهم في حديث الناجي عبدالله قوله ان عبدالرحيم دقلو كان قاعد معاهم في (المكتب) وبغم ما بقولها واخيه حميدتي كان بتعلم في القراية والكتابة.
السؤال لكل كوز لماذا منحتم حميدتي الامي رتبة فريق واخيه الما بقول بغم رتبة لواء وكونتم لهم مليشيا خاصة مفتوحة التمويل والتسليح والتجنيد توزع لها الرتب دون تدريب او رقيب او حسيب؟ واي مشروع اسلامي هذا الذي يستند في حروبه العبثية على مليشيا مسلحة قوامها الجهلة والمجرمين يا حركة يا اسلامية.
شابكننا عملاء الغرب هو في فرق بين عملاء الغرب وعملاء الشرق اوعى تكونوا فاكرين العمالة لمرتزقة روسيا وفتح السودان للمطاريد عمل وطني؟ وهو في عميل بقدر يعمل في السودان اكتر من العملتوه من تقسيم للدولة وتفريط في حدودها وتفكيك للجيش لصالح المليشيات وحرق القرى وانتهاك الاعراض ونهب الموارد وشرعنة الفساد باسم التمكين وتجارة المخدرات والعملة والسلاح، ياخ انتو حتى الحرامية النهبو البلد بتسموهم مفتحين وواقعة ليهم لمن ضيعتو اجمل القيم في بلدنا.
عموما البِلد المحن… لا بد يلولي جناهن.. ودي ياها ولادتكم وتربيتكم وحصادتكم وللاسف كل مواطن سوداني بدفع في ثمن كوارثكم دي من قوت يومه وامنه وامن اسرته
حتى الثورة الجات تنضفكم وقفتوا ضدها وساعدتوا المليشيات على الانقلاب عليها وساهمتم في سفك دماء شهداءها بخاطباتكم التي تصف الشهداء بالصعاليك والعملاء قبل مشاركتهم المباشرة بجهاز امنكم ومليشياتكم ، بل صعدتم الخطابات القبلية والجهوية والعنصرية برموز إدارات اهليه هم من صنعكم حتى اصبح شعار الحركة الاسلامية القبلية هي الحل بدلا عن الاسلام هو الحل، وفي الاخر سلمتو البلد على جبل من ذهب لدقلو اخوان وهسه جايين تتبكوا ، ثورة ديسمبر المجيدة كانت اخر فرصة انكم تقدموا مصلحة البلد على مصلحة حركتكم المفككة بصراعات المال والاراضي والمناصب ولكن مرمي الله ما بترفع.
المكتب الكان قاعد معاكم فيه هبنقة عبدالرحيم دقلو دا ما قلت لينا اسمو مكتب شنو؟ الدعوة والارشاد؟ فقه التحلل ؟ مكتب خلوها مستورة؟ مكتب المجاهدين الجنجويد؟
اها زولكم الما كان بقول بغم دا هسه بقى يقول الخرطوم دا حق ابو منو؟
وزولكم الكان بتعلم في القراية والكتابة هسه بقى يقول بخلي عمارات الخرطوم تسكن فيها الكدايس. ومال كنتو فاكرين درب المليشيات المسلحة وشراء ذمم الادارات الاهليه حا يوصلكم ويوصل البلد لي وين يا بتاعين المشروع الحضاري الاسلامي الذي تمخض وولد دقلو اخوان وعبدالموساد البرهان.
لعنة الله على الكيزان جلابة الجن والجنادب والجراد والجنجويد.