( عزومة مصعب ) …!!

الطيب عبد الماجد:

يوميات علوب

طبعاً كنت سألتكم المره الفاتت قلت ليكم مصعب أخو
أشرف دا عازمنا نمشي ولا لا …!!
ناس كتار منكم قالو نمشي ….وناس قالو استخيرو
وناس قالو ما تمشو بتتعوقو تاني
المهم قررنا نمشي مع الناس القالو نمشي ديل الدنيا
دي ما بتستاهل

( تسمع اللاءات الثلاثة يوم عزومة أبوهو ما تشوف
( الرخية ) يوم عزومة مصعب ) …

( ودا الحاجة ) بحكم الشراكة الإستراتيجية مع ( مصعب ) قال يا أخوانا لازم نمشي نحن ناس بينا ( بيزنس )…!

( تجارة البشر )

( معمر ) قال والله ما دام الزول دعانا ..أفتكر نمشي بغض النظر عن موقفنا من أبوه ..

( دا ياهو الهبوط الناعم للناس الما شافوه )

( منتصر ) طبعاً لو ناس ( مضوي ) تاني عزمو برضو بمشي داخل في شخصية ( الشفيفيفين ) دي …..!!

وانا صراحة إنحزت لصوت الأغلبية….!!

( دا الزول لما يكون داير حاجه ويرميها في الأغلبية)

أما ( جعفر ) بأمانة كان معارض صريح للمشية ..
قال إنتو ما عندكم كرامة …!!

( منتصر ) قال ليهو كرامة في شنو يعني ….!!هل أساءوا لينا الناس ديل …..!!؟
كونو ما أدوك الأكل الفي بالك هل دا معناها إنتقصو من كرامتك ….!! معليش اسمح لي يعني دا سلوك حيواني …!!

يازول قربو يضاربو ….

في النهايه أظنو ( جعفر ) جا معانا عشان يثبت إنو ما حيوان

( أبو النور ) طبعاً لاعب بي حقو ….رغم انو ( الأمجاد ) بتاعتو دي مفروض تمشي الخردة لكن أهو غايتو اسم عربية ….
المره الفاتت ونحن راجعين عامله صوت طول المشوار تشيل وتعزي ….لاعرفناها مجاملانا ولا المكنة بتبكي …..

وصلنا مساء الجمعة الأغر إلى مشارف بيت ( مصعب )
هو طبعا مازي بيت أبوهو من حيث المساحات
لكن والله أحدث …وباين عليهو الذوق …..
الألوان ذاتا غير ….!!

( دا الجيل التاني )

والمطمئن لقينا زي سبعة عربات كدا برا أقل واحدة ( توسان ) ….
وللمره التانيه تعذر استضافة ( الأمجاد ) وسط هذا المهرجان دا …….( بتسممن )

يازول المره دي الظاهر ربنا عوضنا والآذان باقي ليهو زي
عشرة دقايق كدا
معناها الجوه جوه والبره برا ….قفل واحتفل

فعلا دخلنا لقينا زي عشره أنفار كدا …..!!
تلاته صواني كاربة بتكفينا …لدرجه كلنا اتسالمنا …
طلعو ديل مديرين الإدارات العليا في المصانع دي
وكبار الموظفين …

( فطور عمل …وأمل….)

الصينيه الأولى بتاعة البلح بس تطمن ….
بجانب البلح ( التين ) دا غرقان في الموية يشهي ….وطور سنين
والشوربة جات تسو كدي والذبيب دا عايم عوم
وليه يالوزة مابية تعومي …

العدة ذاتا زي ما قال المسلسل …..!!🍽🍴

يا ما انت كريم يارب ….الزول دا بكون حسا بي ظلمنا …

حللنا الصيام دا بي مزاج …. وصلينا مطمئنييين
الصلاة دي ما طمأنينة كمان …

والصواني بدت تجي شايلتها ( سيريلانكيين )

( الليلة الاستقلال ولا شنو ..!! )

الظاهر ديل عمال في البيت والمصنع
يازول حسينا ليك إنو الفطور دا في ( أبوظبي ) …..!!

( ود الحاجة ) بي تحت قال لي ( مصعب ) صعب
زولي وبعرفو …..!!

( والله كان زولك ما عارف )

و ( معمر ) يازول نفس الجلابيه والعمة الجا بيهم المره الفاتت … عصاية تانية بس ….
قال لي دا لبس العمليات الخاصة

و ( جعفر ) تبدو عليه مظاهر الارتياح

وأشرف طبعا رحب بينا من جديد وأصلو ما في بالو
إننا زهجانبن من ( العضة ) الفاتت ولا بتخيل في راسو
إنو في ناس ممكن تكون قافلة على ( لقمة نضيفة )
شدة ما اتعود المعفن ….!!

المهم الصواني أكتر من العدد …والريحة الطالعة بتقول
انو كل الحيوانات مضبوحه الليلة ….

( ليلة قدر مبكرة )

أها فجأة كدا شفنا حركة غريبة كدا بين ( مصعب )
( وأشرف) اخوه دا ….يخشو ويمرقو كدا …..
وتلفونات كتيرة دورت …وزي في انزعاج كدا وربكة

فجأة ( مصعب ) دا جانا قال لينا والله يا أخوانا الحقيقة كلمونا هسا عندنا عمتنا كدا قالو تعبت شديد وودوها ( الحوادث ) هي قاعدة معانا في البيت الكبير
فنحن نستأذن عايزين نحصلهم .. بس والله وحلفنا
البيت بيتكم تقعدو تفطروا ومافي اي مشكلة …
أدونا الإذن بس …

والله يا جماعة بقدر إنزعاجنا لي مرض ( عمتهم ) ..بقدر تقديرنا للموقف البطولي لي مصعب دا بدعوتنا للبقاء وتناول الافطار )

لكن نحن البخلينا منو ……!!!!!

والله لو شفتو المنافقين العازمنهم ديل الساعة الوقفو على حيلهم …تحلف تقول العيانة دي ( عمتم ) هم
يازووول كل واحد لفا عمتو ….واستلم الموقف …
واتكرب
قالو ماشين مع ( الكفيل ) دا …!؟

الله يحرقكم ويحرق يومكم ياخ …ما قالو ليكم افطرو ….!!

وواحد معولق كدا معاهم ما بخجل …..
قال لي ( أشرف ) اوعي تكون بس دي حاجه ( شامة )

( دا النوع البحفظ اسماء العايلة كلها داك ) ….!!

( أشرف ) قال ليهو بتصدق ياها …..

داير يبكي الدجال …..!!
قال ليهو لا لا ..نتحرك طوالي ……

( يتحرك فيك قطر يخمك ياخ ……( شامة ) خالتك ….!؟؟

المهم بعد دقيقتين الناس دي كلها وقفت على حيلا ماشة المستشفي ….
منظرنا بقى ذاتو. يحنن …..!!
نعمل شنو نحن هسا ..!؟

مستشفي نحن ما بنمشي ولا في شي بودينا …

اقسم بالله نمشي المستشفى ( أنور ) دا الا يشيل حق المشوار ….!!

والعواليق ديل كلهم ماشين …..

( ود الحاجه ) قال نخزن مع الوفد السيريلانكي دا نناقش
موضوع العمالة الاجنبية )
….
المهم الناس دي واقفة على حيلا الشال ليهو طعمية
والشال ليهو بطاطساية المهم حاجه سريعة كدا ومحصلين المستشفي …!!
ونحن في حالة يرثى لها …كل حاجه قدامنا إلا اليد قصيرة ياهو دا نص خروف يعاين لينا ونعاين ليهو وما قادرين نتفاوض …!!

( ولسا بيناتنا المسافة واللهفة والشوق والسكون )

بجانب كل المطايب الأخرى …الجداد دا مكرفس منتظر البفكو و( السجوك ) والجبنة البيضا …والمضفرة والممشطة ….وقصة كدا

( ياربي نحن عملنا شنو في الدنيا دي …واضح إنو نحن عاملين حاجه دا اختبار أقسى من الأول والله )

وفي عز الجوطة دي والناس دي طلعت مفاتيح عرباتا ….جعفر دا شفتو خبت ليهو خمسة ( سجوكات ) مع بعض وحبس بي جبنة …

وانا غايتو في عز الأزمة دي اديت الصينيه دي نظرة من قصاد الطاقة …وإننا حنخليها ونمشي الدنيا دي مسخت لي

لكن الله دا كمان ما بنقدر على شكرو ….لطيف بعبادة وعليم خبير

جا ( أشرف ) من جوه
قال نبشركم الدكتور قال الحالة مستقره وماعندها الحبة
أنا ذاتي اتكلمت معاها …..الحمد لله حمداً كثيراً
دي بركاتكم …يلا يا جماعة نقعد نفطر بسم الله ….

قربنا نسجد سجدة شكر …دا يوم عظيم ……

والمتوالين ديل دخلو مفاتيحهم في جيوبهم ……
وقعدوا في الواطة المستهبلين
واحد منهم الظاهر مقدم لي ( سلفيه )
قال أنا كنت عارف حاجة ( شامة ) المبروكة دي ما بتجيها عوجه …!!

( أحلف ..!!)

( غايتو مرات كدا في ناس بتفوقو حتى على نفسهم زي الزول دا ) ….!!
وهناي داك

يازووول اتفرجخنا ليك في نص الواطه دي …خاتين ليهم مساند كدا تشهيك الواطه ذاتا

والله كلمنا الصواني دي كلام …..أكلنا أكل …….
الواحد ذاتو ما عارف يبدا من وين وينتهي وين
الوحيده الجليناها ( العصيدة ) بتذكرنا يوم ( أحد ) …….الليلة بدر الكبري ……
وكأنو رمضان قد بدأ اليوم …..

معطنا الصينيه دي معط الذين آمنو …..وكل ما نتذكر
السبع العجاف نمعط زيادة ….
صورت الجداد المشوي لي ( مشاعر ) …بتحبو …!!

غايتو وقفنا نبق ….ولله الحمد

ود الحاجة شدة ما شبع غمت للسيريلانكي دا
كراع جدادة …. صدقو داك رفضها…….!!

( هم ديل قاعدين في المزرعة ذاتا …. انت مع العمالة الموسمية دي بقيت تجدع كراع كمان….. الله قادر ) …!!

المهم يازول القهاوي دورت والشايات والتحلية دي
البيت السوري كلو هناك
والعصاير منتخب

تلاته منهم بصنعوها هم ذاتم ……!!

( غايتو الدنيا دي وكت تديك بتديك مع العصير ) ….
الله يديهم ويدينا

( معمر ) طلع بي صفقة قرب يعرض بي عصايتو …..

و( مصعب ) حكي ليهو أبيخ نكته أسمعها في حياتي
اتخيلو الجماعة ديل ماتو من الضحك ….!!

القال اوعى تكون دي حاجه شامة عامل فيها اتشرق من الضحك المجرم

( صحي المعايش جبارة ) …!!

المشكلة ( معمر ) ذاتو ضحك ….!!

النحكي ليكم نكتة مصعب ….
قال بمناسبة رمضان دا في واحد بلغ بشكير نشف ريقو
اها ياها دي النكتة …ماشفتو القرقرابه والاستغفار

أنا نوع النكت الزي دي طوالي بتعمل لي حيرقان

مصعب ذاتو بالغ …داير جيب تقيل ودم خفيف ….!!

وأستاذنا بلطف هذه المرة وخرجنا نكاد نجرجر أرجلنا
بعد هذه المعركة الضروس …!!

جعفر قال لي ما بدونا الباقي سفري ……

( أنور ) فرحان فرح …بحب العضة المجيهة قعدتو ذاتا
في الدركسون اتغيرت …

وعدنا هذه المره فاتحين …..
طبعا الحاجه ( الشغالة ) الوحيدة في عربية أنور دي
إنو فيها سماعات كاربة جابا ليهو دكتور ياسر صاحبنا من الدمام ….!!

( ود الحاجة ) قال ليهو ارح ياخ سمعنا حاجه من بيت الكلاوي
قال ليهو كلاوي أكتر من الاكلتها دي …..!!

طوالي ( أنور ) نقر ( الاستارتر ) ( طبعا الا تلاته مرات حتى تدور
)
وعزانا ليك بي حقيبة زي الحقيبه

ومسوا نوركم
شوفو المن جبينا صباح
الصباح إن لاح .. لافائدة في المصباح
هل أتاك حديث الكوكب النضاح
قمره تمطر خمره وحارسها الفضاح
لو تحيجنا محاسن الشمس للإيضاح
مابتحيجنا محاسن محيها الوضاح
مسو نوووركم
ياسلام ياخ …..

شوف السودان دا طاعم كيف …
بلد بي حقها ما معزومة …والناس حكومة

والصباح ان لاح …..!!